¡¡¡Mel Gibson nun yía una guitarra!!!

Bono, ¡espectacular!

Nun lo vais creyer, pero -ya dígolo de bona mano- Braveheart, Mad Max, el poli colgao d'Arma Letal ya Mel Gibson... ¡¡¡Son la miesma persona!!!

Sí ho. A min sorprendiérame tanto cumo a vós, pero hai que ser fuertes ya saber llevalo.

Conque Mad Max ía un xofer que ta más pasáu de vueltas qu'una llavadora Westing House, Braveheart ía un escocés chungu, bipolar ya asexual, el poli colgao d'Arma Letal "un zeppelin que surca raudo y veloz los cielos de Cincinnati" ya Mel Gibson un católicu prácticante, padre de familia ya con un perru que llaman Anthony Eden, ya da discursos.

Pos sí, ¡qué fuerte! lleva una vida mui variada. Paez ser que normalmente ía Mel Gibson. A continuación vou falar un poucu d'esti personaxe.

Mel Gibson nacéu n'Australia, un pequeñu país ente Alemania ya Italia. A la edá de 13 años apaecéuse-y nun suañu Alfred Hitchock ya mandó-y que se feixera actor. Conque esperóu hasta los 18 años, sacóu'l carnet de conducir, cambéu de look ya rodóu Mad Max. Acabóu de rodalla nel branu ya inda nun-y salieran tetitas.

Conque garróu la baxa, pero cumo n'Australia hai canguros ya nun tienen por ello seguridá social marchóu pa los EExx, un país tolerante colas minorías ricas. Ya ehí, inda mediu llocu, grabóu Arma Letal, pero en realidá nun actuaba, yera el miesmu. Foron los años 80, que vivíu intensamente, baxo l'amarguría de la sua depresión. ¡Nin facese col BatMóvil en propiedá-y quitóu la sua depre!

Asina hasta que se dióu cuenta que las tetas nun-y diban medrar yá más. Entos ensin más cousa marchóu a probar fortuna a las isllas británicas, cumo faltaba ún pa char un partíu de rugbi, pos dixo "eiquí toi you", ya tan bien lo feixo qu'arimouse-y John Major ya dixo-y, cola voz de Yoda "Aciagos -m'encanta esta palabra, pero nunca sei si lleva h ou non. Esta vegada ensin h- días estos son, sí señor. L'IRA, las Malvinas -ups Falklands n'inglés. Sabiendo eso ya dominas el 12% de la llingua de Shakespeare- ya la xuba del petroleu. Ya amás chánonos de las competiciones de fubol d'Europa porque tábamos cumo pollinas. Asina qu'escoyíu voluntariu pa grabar Braveheart. ¡Vas llevar falda!".

Al oyer esta cabera coletilla del discursu de John Major Mel Gibson aceptóu encantáu. Ya nun quitóu la miesma falda en tola peli, cousa de la que nengún críticu de cine fala enxamás. Por eso la calidá que nós gastamos...

Bono, eso fou n'Escocia, pero aburrióu d'Escocia ya dixo: "Volvo pa los EEXX".

Nos EEXX ya con munchos cuartos ya con fama la cousa cambióu. Quedóu embarazáu ya touvo cachorros varios. Poro, mercóu una furgoneta ya diba a playa ya a misa. Pero cumo la Jargo tenía pinta mala, pos parábalu la poli, ya entós pasóu lo inevitable. Entamóu a baxar cacharros cumo un campeón ya entós salía col Bat-Móvil a facer tramu por Beverly Hills, ya la cousa fora mui gorda...

Ensin embargo agora ta reconciliáu cola sociedá. Feixo un par de pelis, "Apocalypto" ya "Por los clavos de Cristo" ou dalgo asina, que fonon dos chascos, pero'l gobiernu d'Australia dixo, "cuoñu, pa unu famosu que tenemos..." Ya atroparon tol sable que poudienon, ya feixenon un desiertu, que llamanon "de Gibson" pol sou más internacional -ya católicu, que nun deixa de significar universal- actor, Mel Gibson.

Actualmente ía gobernador de California, pero nun vou falar de política, ésti ía un blogue de Cine..