La Naranja Mecánica

Agarraivos los machos neños: The Orange Machine, ou cumo dicimos pa esta parte "La Naranja Mecánica".

La Naranja mecánica fou la primera peli en color del cine, ya entós fou cuando se vieron un montón de fallos nel personal. Por exemplu, nas pelis en Blanco y Negro los actores que yeran homes (ya cuanto más paisanu más) maquillábanse. Los guah.es ya las muyeres non. Pues cuando ficieron La Naranja Mecánica nun se dieron cuenta, ya los paisanones salienon maquillaos, ya las muyeres non.

Lo principal d'esta peli ía lo sanu que yera'l protagonista, que yera Bruce Willis de mozu. Vou resumir la peli: Sal, en vez d'a cacharros sal a lleiche nun chigre que nun ía nin El Cobertizo nin El Molín, pero ía mui prestosu -primera escena-. Ya al final el prota ta mui arrepentíu ya eso, ya nun s'adapta nin a un cursu de los que faen pa las personas mayores pa que deprendan internet. Lo del mediu de la peli, el restu, ía circunstancial.

Bono, el director de la peli fora'l gran Woody Allen, na sua etapa Londinense, porque touvola. Ía más, el conceutu de James Bond nacéu de los sous lentes (úsalos pa pensar, por eso de que dan aspectu intelectual). Pero centrémonos en La Naranja Mecánica.

Diba dicir qu'ía una peli pa tolos públicos, pero mentiría. Si te da grima char un colirium a daquién nos güeyos nun la veas, porque faenlo na peli. Lo que pasa ía que ves esta peli ya sales del cine (ou del sitiu unde la veas) feichu un Highlander. Ya a los dos días la peli date que pensar, dices tu "¡Cuoñu, La Naranja Mecánica! Esi coche paezse al "zapatilla" que salía nesa peli... pero nun ía, ía un MG". Cousas de británicos.

Porque yá dixe que la peli ía británica. Tienen bon cine los ingleses, claro de tanto "rodar", dalguna peli-ys tien que salir bona. Hehehe. Perdón, humor británicu.

Compénsovos, sufríos llectores cola peli "Coyotes (galácticos) de Paya" pa la selmana qu'entra, que tamién ía peli inglesa.