Steven Seagal

Muncha xente llee esti blogue ya diz "Esti par tán cumo burros. Sobretoo Diestru". Ya muncha razón llévanla. Pero yía que según consultamos información sobre los actores/personaxes d'esti mundu en realidá nun cagamos muncho nin res fora del pote... pa que veáis esta yía la vida d' Stevcn Seagal:

Steven Seagal fou fíu de pái xudíu ya mai medio irlandesa ya Cherokee; eso esplíca munchas cousas. Porque efeutivamente, Seagal antes de nacer nun fou un fetu, fou un cóctel. Yía sobriu cumo un irlandés, fai l'indiu cumo un cherokee ya yía raru ya bizarru cumo un xudíu. Ya pa encima nacéu en Landsing, unde la CÍA.

Conque pa que nun diera muncho la murga, na sua casa apuntaronlu a Kárate, a Taekwondo ya a dellas artes marciales, ya cumo nun bastóu, unvianonlu a Xapón, pa qu'aselara.

Nos años 80 cansanon d'él en Xapón, ya mandanonlu outra vegada pa los EEXX. Ehí entróu nel mundu'l cine cumo una especie de téunicu pa las películas d'artes marciales, una especie de coordinador d'especialistas. Ensin entrar nel SOMA.

Paralelamente trabaya de Guardaespaldas de las sua segunda muyer, una actriz. Nos 80 como nel sieglu XXI el braguetazu siguía de moda, hai cousas que pouco cambia, ya darréu Seagal entama a facer pelis cumo prota. ¡Si los harmanos Lumière llevantan la tiesta... del sustu volven baxalla!

Mentres vivíu colas suas dos muyeres actrices feixo un montón de pelis, agora divorciáu, los críticos avezan dicir que yía faltu de talentu, lo cual nun paez muncha novedá. Si a eso amestamos que las pelis son mui malas... porque por exemplu Robert de Niro feixo pelis malas, pero yía un Highlander interpretando.

Lo meyor son las curiosidades d'Steven Seagal: paez que cuando grababa emocionabase ya dibase-y la mano, tien dao en verdá a outros actores; tien mancáu col sou güelpe mayestru, "la patada por dientru" ou tamién conocida cumo "a los güevos".

Conque Seagal tien cumo mala costume, diría you zuna, dir retando a outros actores karatekas... En serio. Ya
Seagal suel llevallas. Asina hasta que diou con Jean Claude Van Damme, que nuna fiesta na casa d'Stallone -verídicu, Cernícalo Furioso andaba prehí- coincidienon. Seagal aporfióu ya apostóu que yera capaz de patea-y el culu, ya durante media nueiche anduvo trés d'él. Hasta que Van Damme cansóu ya aceptóu. Seagal entós dixo que meyor non... ¡por vello!

Esti zampabollos quería pegase con Van Damme, campeón de Karate, Muai-Tai, culturismu...etc

Ya nun tuvienon que nin siquier separallos, pero sí coyer ente Schwarzeneger ya Stallone a Van Damme, que lu mataba. Entós Seagal marcha pa un chigre, ya Van Damme vei tres d'él, ya nun lu enganchóu, que sinon saca-y tolos dientes. Por cierto, dicían que nesa fiesta servía las copas Chuck Norris...

Paez ser que d'ente los karatekas namai tien un amigu, Jackie Chan, que namás lu quier pa facer de malu nas suas pelis... Tán los dos pa llamber.

Bono, Seagal feixo munchas pelis, en fin, nenguna fou La Lista de Schindler, Memorias de África, ou Citizen Kane, porque pa eso yía Steven Seagal, ya tien qu'haber xente pa too; ya tamién toca la guitarra nun grupu, creo que n'El Canto del Loco, ou dalgo asina.

Actualmente culpa al FBI de la cayida de la sua carrera... hohoho