Al Final De Las Escaleras

Esta peli yía la típica que recomiendo a los mious peores enemigos. You vila ya -en confianza, pero nun lo contéis- firméi los calzoncillos. Sí, manchéi tol refaxu. Fou humillante, pero yía que la peli a-co-yo-na.

Va d'un guah.e, Cristopher Robin peimeque, que tenía un padre mediu raru, yera constructor, pero cola crisis pues tenía qu'espabilar. Entós afuega'l fíu -nun yía'l nome d'un queisu- ya merca outru fíu, que conviertese en Secretariu d'Estáu. Cousas de la peli. Lo cual paez la bibliografía de Miguel Gila. ¿Sedrá cine Gilaniananu?

Conque Stephen King vei vivir a la casa ú morriera Cristopher Robin, porque la sua familia morréu matada d'un accidente, lo cual al principiu yá paez qu'acoyona. Buo. Entós cumo la casa paecía tener tolos avances de la domótica más moderna, pero ensín corriente, Stephen entama a duldar, ya llama a Hidroeléctica del Cantábrico. Éstos, pa estos casos, tienen videntes, porque nun vei ser que nun cobren el recibu, eso non.

Entós vei una vidente col home, que escribe durante la sesión d'espiritismu, pero a-co-yo-na. Inda acoyona más cuando'l Stephen King usa la grabadora, ya sería cumo un capítulu de Camín de Cantares, si nun fora qu'eiquí falaba Cristopher Robin ya más ou menos eiquí fou unde derrapéi...

Bono, Almendrábar diz, cuando quier facese l'entendíu en cine, qu'esta fou la meyor peli de terror que véu. Pero cumo you nun sou Almendrábar, pues you quedome con Scooby Doo I ya la sua secuela, Scooby Doo II, que son de miéu, pero nun acoyonan tantu.

Al final la peli acaba cumo una mascletá de las fallas valencianas, Cristopher Robin I mata a Cristopher Robin II, que paecíase a Warren Cristopher, políticu chungu d'EEXX, d'esteriores, ou dalgo asina. En fin, you nun vería esta peli, ou si la viera nun la vería mudáu.... ¡Facéime casu!

El Cuervo

Esta selmana en Cine de Caleya, El Cuervo, de Russel Crowe.

El Cuervo ta interpretada pol fíu de Marlon Brando, que morréu durante la peli d'aburrimientu. Sin embargo a min paezme entretenida. Bono, tamién teo que dicir que creo en Mazinger Z. Pero la mia vida privada nun ha llugar eiquí.

Resulta que na Nueiche los Muertos (talamente cumo la de güei) los asesinados inxustamente tornan a la vida a vengase. Timothy yera un alma pura asesinada por inxesta masiva de polvorones. Yera un rockeiru cristianu, pero cumo Ulan Bator nun lo fichara porque namás facía playback ya ellos son unos "pofesionales" marchóu camín de Manhattan unde hai muncho comiciu.

Ya ehí faise famosu, pero mátanlu. Entós regresa a char una partida de parchís xunto con Carrero Blanco -que daba pena vellu- ya un misteriosu cuervu negru...

Carrero Blanco quier facer col cuervu una paella entós Timothy dase cuenta que lu asesinanon inxustamente unos malos malosos, cueye'l cuervu, da-y trés euros ya una bolsa chetos a Carrero Blanco ya entama a matar a tolos malos.

Al final nun m'alcuerdo mui bien, porque fai un montón de tiempu que ví la peli, pero que vaya, Timothy véngase, el cuervu nun yera tal: Al medrar tresformóuse nuna pita roxa ya vive por Asturias ya sal colos del Bable glayando ¡oficialidá!, ya Carrero Blanco alquilóu colos trés euros un coche, que bono, españóu, ya sabéis lo gafe qu'esti home siempres fora, ya volvéu morrer.

Son cousas del direutu.

¡¡¡¡Feliz Nueiche de los Muertos!!!

Psicosis

Psicosis ía una peli interesante. L'entamu d'esti film ía mui paecíu al de la española Airbag, de Juanma Bajo Ulloa. Pero Psicósis feixola Ingmar Bergman, y como tolas pelís del direutor noruegu, tien mui bona fotografía. Ía lo que tien.

Psicosis vei d'una neña qu'anda pol mundu nun coche con un fatu cuartos, afuxendo del sistema. Al principiu sal un guardía, ya por eso la peli remembra Airbag.

Llou la peli da un xiru inesperáu, cuando entra nun chigre ya da con un mileurista que vive cola sua mai ya diseca páxaros. En realidá trátase d'un fugáu, un fugáu d'un d'esos rexímenes autoritarios de la Europa del sieglu XX. Pero peor.

Conque'l tipu esi mata a tolos clientes ya'l Chigre vei mal, porque con eso naide quier para entós, por mieu ente outras cousas.

La película ta en blancoynegru, dígolo por si a dalgunu-y cansa. Prestan más las pelis que tan en color, a min polo menos.

You d'esta peli destacar que presta ver coches vieyos de los años anteriores a que Roy Orbison s'operara de cambiu de raza. Primeiru fora negru, llou tirolés.

Nun vou cuntavos mentiras. La peli da dalgo de mieu. Hai una escena, na qu'asesinan nuna ducha, ya cuntase que ta patrocinada por una conocida marca de sanitarios belga, llamada "Rock".