El Resplandor

Anueite touve un suañu, ya güei teo mal cuerpu, porque nesi suañu apaecía'l guah.e d'El Resplandor moviendo'l deu pidiendome que falara d'esta película, protagonizada por Jack Nicholson, ente outros actores.

La peli fora grabada nos Estaos Xuntos nos años 70, ya'l direutor qu'escoyera Nicholson nun fora outru que'l xenial Ingmar Bergman, lo que feixo esta peli más intersante, con grandes planos ya una fotografía, valga la redundancia, de película.

N'El Resplandor, por primera vegada nel cine un negru fai de bonu, lo que pasa ía que cumo col tema los dereichos cíviles inda había dellas llagunas na sociedá americana de la época, pos anque apaez ya ía bonu, mátanlu, pero polo menos bonas intenciones vese que las había.

Entrando en fariña, n'El Resplandor el xefe de Nicholson, cumo yera temporada baxa nel percebe, mándalu cola sua familia de vacaciones a folgar a un monte, que tien un hotel. Ya paez ser qu'el cambéu del mar al monte, sienta mal a Nicholson -bono, eso ya las malas compañías d'unas pantasmas con una actitú un poucu cumo si fora nerviosa pa cola familia del nuesu protagonista. Anque en realidá nun ía pa menos, porque'l fíu yera un guah.e qu'acoyonaba.

Entós, Nicholson arrellouria, ya vuelvese pa contra los de sou, pero al final llega Luke Skywalker, en paru dempués de la Guerra las Galaxas, ya saca'l sable-láser ya toos a callar.

Bono. You si touviera que reconmendar esta película facíalo polo baxu, asina cumo sí "nun ta mal ya eso", pero curiái nun suañar col fíu de Nicholson na peli, nun vos volvais tan neuróticos cumo él.

Hasta la selmana que vien, gañanes.